"Jaqynda Ózbekstan kóp áıel alýdy nasıhattaýǵa resmı túrde tyıym saldy. Ákimshilik jaýapkershilik júktedi. Olardyń da mańdaıyna “talaqshylardyń” yzǵary ábden tıgen sıaqty", dep jazady áleýmettik jelide jýrnalıs Kamshat Tasbolat.

Al Qazaqstanda qaı kúni telearnany qospa, gazet-saıt oqyma, kileń “Úsh áıel alǵan kásipker tájirıbesimen bólisti”, “Eki áıeli bar azamat: 10 balamdy ókimet baǵyp bersin”, “8 áıeli bar erkek otbasynyń tatý ómir súrip jatqanyn aıtady” degendeı pozıtıv saryndaǵy aqparattardan kóz súrinedi.

“Qalaýlymnyń” kez kelgen sanyn ashyp qarańyz, betindegi bezeýi bes eli 18-20 jastaǵy balalar “ekinshi áıel, toqal alsam qalaı qaraısyz” dep otyrady qyzǵa…

Aınalaıyn, sen eń aldymen betińdegi bezeýińdi ketirip al. Sosyn úılenip, bir otbasyn asyrap-baǵyp kór. “Eki sıyr – aıran, eki áıel – oıran” dep babalarymyz tyıǵandaı, oırannyń astynda qalyp, júıke júıeńdi tozdyryp, ómirińdi qysqartpa!

Ózbekstannan úlgi alý kerek!

– Adamı kapıtaly zor Ózbekstan eldi keri tartyp otyrǵan máselelerdiń bárin zań júzinde tyıyp, ekonomıkalyq damýdyń dańǵyl jolyna túsip jatyr.

Biz keritartpalyqtardy tyımasaq, aqparattyq salada “kóp áıel” alý nasıhattala berse, bul tek bir otbasynyń ǵana emes, memlekettiń tragedıasy!

Esterińizde me, óz balalaryn terezeden laqtyrǵan áıeldiń jaıy, kúıeýiniń toqal alǵanyn kótere almaı sondaı qadamǵa barǵan. Túrli aǵymnyń jeteginde jarylaıyn dep júrgen adamdar kóp.

Eýropadaı damımyz deımiz, Eýropa Odaǵy, Amerıka bizdiń aqparattyq salada destrýktıvti aǵymdardyń nasıhaty men áıel statýsyn kemsitýdi kórse, qoldaıdy dep oılaısyzdar ma?

Aıtpaqshy, mynda úsh áıel alǵan bireý “toqal alýǵa áıelinen ruqsat suraıtyn erkekti atý kerek” depti. Osyny túrli saıttar, tipti ákimdik qarjylandyratyn gazetterge deıin nasıhattap jatyr. Adam óltirýge shaqyrý – terror!

Mundaı spıkerdi ıntervúǵa shaqyrmaq túgili, ákimshilik jaýapqa tartý kerek! Osyndaı radıkaldy aqparattyq nasıhatty toqtatyńyzdar! Bul destrýktıvti aǵym ıdeologıasyn nasıhattaýmen birdeı, – deıdi jazba avtory.